Şamaxı ilə Konstantinuv-Lodski şəhərlərinin qardaşlaşması barədə protokol imzalanıb
Milli Məclisin deputatı, Avronest Parlament Assambleyasında Azərbaycan nümayəndə heyətinin rəhbəri Elxan Süleymanovun təşəbbüsü ilə Polşada səfərdə olan nümayəndə heyəti səfərin dördüncü günü Lodz Voyevodallığında görüşlər keçirib.
SalamNews-un məlumatına görə, Konstantinuv-Lodski şəhərində keçirilən görüşdə şəhərin meri azərbaycanlı qonaqları səmimi salamlayıb. E.Süleymanov və Şamaxı rayon İcra Hakimiyyətinin başçısı Asif Məmmədov çıxış ediblər. Deputat Azərbaycan-Polşa münasibətlərindən söhbət açıb, 1858-ci ildə Şamaxıda anadan olmuş polyak əsilli memar Yevgeni Skibinskinin Bakıda layihələndirdiyi binalardan danışıb. O, memarın anadan olduğu Şamaxı şəhərində abidəsinin qoyulacağını bildirərək, tanınmış Azərbaycan heykəltəraşı Natiq Əliyev tərəfindən hazırlanacaq heykəlin maketini merə təqdim edib.
Görüşün sonunda Şamaxı ilə Konstantinuv-Lodski şəhərlərinin qardaşlaşması ilə əlaqədar niyyət protokolu imzalanıb.
