Şamaxıda VII M.Ə.Sabir Bədii qiraət müsabiqəsi oldu (Fotolar)
May ayının 24-25-də Şamaxı son yeddi il ərzində olduğu kimi yenə də M.Ə.Sabir şeirlərilə nəfəs alırdı. Şamaxının millət vəkili Elxan Süleymanovun təşəbbüsü və dəstəyi ilə keçirilən Yeddinci M.Ə.Sabir Bədii Qiraət müsabiqəsinə həmişəki kimi maraq böyük idi. Aprelin 20-dən başlayaraq təhsil müəssisələri səviyyəsində keçirilən müsabiqə öz kuliminasiya mərhələsinə qədəm qoymuşdu. Müsabiqənin rayon turuna Şamaxının ümumi və tam orta məktəblərini, Şamaxı Dövlət Regional Kollecini, Azərbaycan Dövlət Pedaqoji Universitetinin Şamaxı filialını təmsil edən 200-dən artıq iştirakçı qatılmışdı.
İştirakçılar tanınmış şair Musa Yaqubun rəhbərlik etdiyi, ölkənin tanınmış elm və mədəniyyət adamlarının daxil olduğu münsiflər heyətinə fərdi, qrup halında və kreativ çıxışlarını təqdim etdilər. Sabir şeirlərini qeyri-adi təfsirdə – şeirlər əsasında qurulmuş mini-tamaşa formasında təqdim edənlərin çıxışları xüsusilə maraqla qarşılandı. Müsabiqə iştirakçılarının bir çoxu məxsusi olaraq bu tədbir üçün tikdirdikləri kostyumlarda, səylə hazırladıqları qrim, dekorasiya və rekvizitlərdə çıxış etdilər. İştirakçılar arasında Sabir şeirlərini Azərbaycan dilində söyləyən bir neçə milliyyətcə rus şagirdin olması, eləcə də şairin rus dilinə tərcümə edilən şeirlərinin səsləndirilməsi yaddaqalan idi. Bütövlükdə müsabiqə parlaq keçdi, həm tamaşaçılarda, həm də iştirakçıların özlərində böyük təəssürat yaratdı.
Mayın 25-də Şamaxı şəhər mədəniyyət sarayında millət vəkili Elxan Süleymanovun, rayon rəhbərliyinin, ictimaiyyət nümayəndələrinin iştirakı ilə müsabiqə qaliblərinin mükafatlandırma mərasimi oldu. Aktyor Səfa Mehdinin aparıcı olduğu tədbirdə münsiflər heyətinin üzvləri şair Musa Yaqub, filologiya elmləri doktoru, professor Asif Hacıyev, Sabir ev-muzeyinin direktoru, əməkdar mədəniyyət işçisi Rəqsanə Xəlilzadə, Şamaxı rayon İcra Hakimiyyəti başçısının birinci müavini Qasım Qasımov çıxış edərək, müsabiqənin tərbiyəvi əhəmiyyətindən, rayonun mədəni həyatında artıq özünə möhkəm yer tutmasından danışdılar və bu tədbiri yeddinci ildir keçirən, rayonun bir sıra kəndlərinə su çəkdirib, Sabir bulaqları inşa etdirən və böyük şairin adını əziz tutan millət vəkili Elxan Süleymanova minnətdarlıqlarını bildirdilər.
Şamaxının millət vəkili Elxan Süleymanov artıq yeddinci ildir müsabiqənin münsiflər heyətinə rəhbərlik edən şair Musa Yaqubu 80 illik yubileyi münasibətilə təbrik etdi. Millət vəkili Sabirin Azərbaycan ədəbiyyatında tutduğu mövqedən, onun şeirlərinin aktuallığından danışdı, qalibləri və onların müəllimlərini təbrik etdi.
Tədbirin sonunda müsabiqə qalibləri müakafatlandırıldı, onlara qiymətli hədiyyələr və diplomlar təqdim olundu.
