Milli Məclisin deputatının fərdi saytı tərəfindən hazırlanmış yeni fotoalbom nəşri altı dildə çapdan çıxmışdır
Milli Məclisin deputatı Elxan Süleymanovun fərdi saytı (www.elkhan-suleymanov.az)tərəfindən hazırlanmış yeni nəşr – “Avronest Parlament Assambleyasının ikinci növbəti sessiyası (2-4 aprel 2012 Bakı, Azərbaycan)” adlı fotoalbom çapdan çıxmışdır.
AzərTAc xəbər verir ki, təqribən 200 şəklin yer aldığı fotoalbomda Azərbaycan Respublikasının Prezidenti İlham Əliyevin, Milli Məclisin sədri Oqtay Əsədovun, Genişləndirmə və Avropa Qonşuluq Siyasəti üzrə Avropa komissarı Ştefan Fülenin, Avronest Parlament Assambleyasında Azərbaycan nümayəndə heyətinin rəhbəri Elxan Süleymanovun Avronest PA-nın sessiyalarındakı çıxışlarının mətni də yerləşdirilmişdir.
Bu il aprelin 2-dən 4-dək Avropa İttifaqı sərhədlərindən kənarda ilk dəfə olaraq Azərbaycan paytaxtında keçirilən və ölkəmizin böyük siyasi uğuru kimi dəyərləndirilən Avronest PA-nın sessiyasında 17 ölkədən 160-dan çox nümayəndə iştirak etmişdir. Mühüm qərarların qəbul edildiyi sessiyanın yüksək səviyyədə təşkil olunması iştirakçılar, xüsusilə də Avronest PA-nın həmprezidentləri Kristian Vigenin və Boris Tarasyuk tərəfindən xüsusi vurğulanmışdır.
Milli Məclisin deputatı Elxan Süleymanovun rəhbərliyi ilə hazırlanmış nəşrin buraxılışına məsul siyasi elmlər üzrə fəlsəfə doktoru Fuad Babayevdir.
SSRİ Dövlət mükafatı laureatı, Əməkdar İncəsənət Xadimi, Milli Məclisin mətbuat xidmətinin baş məsləhətçisi Rafiq Qəmbərovun fotoşəkillərinin yer aldığı nəfis tərtibatlı fotoalbom “Şərq-Qərb” nəşriyyatında çap edilmişdir.
