Finlandiyanın siyasi gənclər təşkilatlarının rəhbərlərindən ibarət nümayəndə heyəti Azərbaycanda səfərdə olub
4 may 2012-ci il
Milli Məclisin deputatı, Avronest Parlament Assambleyasında Azərbaycan nümayəndə heyətinin sədri Elxan Süleymanovun təşəbbüsü və dəvəti ilə Finlandiyanın siyasi gənclər təşkilatlarının rəhbərlərindən ibarət nümayəndə heyəti mayın 2-3-də Bakıda səfərdə olub. E. Süleymanovun APA-ya verdiyi məlumata görə, nümayəndə heyətinin üzvləri Qaçqınların və Məcburi Köçkünlərin İşləri üzrə Dövlət Komitəsinin sədr müavini Gəray Fərhadovun qəbulunda, Binəqədi rayonunda məcburi köçkünlərin məskunlaşdığı yataqxanada və yeni salınmış yaşayış kompleksində olublar.
Finlandiya heyəti “İrəli” gənclər təşkilatında azərbaycanlı həmkarları ilə tanışlıq görüşü keçirib və Azərbaycanda Vətəndaş Cəmiyyətinin İnkişafına Yardım Assosiasiyasında olub.
Finlandiyanın Sol Gənclər Təşkilatının rəhbəri Andersson Li Sigrid bildirib ki, Dağlıq Qarabağın işğaldan azad edilməsi və daimi yaşayış yerlərindən qovulan insanların hüquqlarının müdafiəsi diqqətdə saxlanılmalı, Avropanın siyasi gündəmində və ayrı-ayrı Avropa ölkələrinin ictimai fikrində tez-tez vurğulanmalıdır.
E. Süleymanov isə bu kimi səfərləri Azərbaycan gerçəkliklərinin beynəlxalq aləmə çatdırılması və dünyada Azərbaycan barədə doğru və obyektiv təsəvvürlərin yaradılması baxımından əhəmiyyətli olduğunu bildirib.
Digər linklər:azadinform.az salamnews.org
