Finlandiya parlamentində Dağlıq Qarabağ münaqişəsi mövzusunda dinləmələr keçirilib
Bakı – APA. Bu gün Finlandiya parlamentində Dağlıq Qarabağ münaqişəsi mövzusunda dinləmələr keçirilib.
APA-nın məlumatına görə, dinləmələr AVRONEST PA-da Azərbaycanın nümayəndə heyətinin rəhbəri, Şamaxının millət vəkili Elxan Süleymanovun təşəbbüsü və təşkilatçılığı ilə baş tutub.
Dinləmələrdə Azərbaycan baş nazirinin müavini, Qaçqın və Məcburi Köçkünlərlə İşlər üzrə Dövlət Komitəsinin sədri Əli Həsənov, iqtisadi inkişaf nazirinin müavini Sevinc Həsənova, Azərbaycan-Finlandiya parlamentlərarası əlaqələr üzrə İşçi Qrupun üzvləri Elxan Süleymanov və Ayaz Orucov, millət vəkilləri Fazil Mustafa, Zahid Oruc, Ceyhun Osmanlı iştirak ediblər. Dinləmələrdə Azərbaycan baş nazirinin müavini, Qaçqın və Məcburi Köçkünlərlə İşlər üzrə Dövlət Komitəsinin sədri Əli Həsənov geniş məruzə ilə çıxış edib. Həmçinin iqtisadi inkişaf nazirinin müavini Sevinc Həsənova “Azərbaycanın iqtisadi inkişafı və perspektivlər” mövzusunda çıxış edib.
Tədbirdə Finlandiya-Azərbaycan dostluq qrupunun rəhbəri Eero Lehti, Avropa İttifaqının Qafqaz regionu üzrə keçmiş xüsusi nümayəndəsi, səfir Heikki Talvitie, Şərq Araşdırmaları üzrə Aleksanteri İnstitutunun direktoru, Helsinki Universitetinin professoru Markku Kivinen və Finlandiya parlamentinin üzvü xanım Elisabeth Naucler çıxış ediblər.
Səfər zamanı nümayəndə heyətinin üzvləri həmçinin Helsinki şəhərinin meriyasında qəbulda olublar. Səfər çərçivəsində Finlandiya Parlamentinin spikeri cənab
Eero Heinaluoma, Finlandiya-Azərbaycan dostluq qrupunun rəhbəri cənab Eero Lehti və Finlandiyanın iş adamları ilə görüşlər də baş tutacaq.
