Şamaxının millət vəkili Elxan Süleymanovun fərdi saytının (www.elkhan-suleymanov.az) yeni nəşri – “Avronest Parlament Assambleyasının İkinci Növbəti Sessiyası (2-4 aprel 2012 Bakı, Azərbaycan)” adlı foto-albom çapdan çıxıb.

Təqribən 200 şəklin yer aldığı foto-albomda Azərbaycan Respublikasının Prezidenti İlham Əliyevin, Azərbaycan Respublikası Milli Məclisinin Sədri Oqtay Əsədovun, Genişləndirmə və Avropa Qonşuluğu üzrə Avropa Komissarı Ştefan Fülenin, Avronest Parlament Assambleyasında Azərbaycan nümayəndə heyətinin rəhbəri Elxan Süleymanovun Avronest PA-nın sessiyalarındakı çıxışlarının mətni da yerləşdirilib.

Kitab 6 dildə – Azərbaycan, ingilis dilləri ilə yanaşı, həm də Avronest PA-nın digər üzv dövlətlərinin dillərində (erməni, gürcü, moldavan və Ukrayna) işıq üzü görüb.

Qeyd etmək lazımdır ki, 2-4 aprel 2012-ci il tarixində Bakıda baş tutan və Avropa İttifaqı sərhədlərindən kənarda ilk dəfə olaraq Azərbaycan paytaxtında keçirilən və ölkəmizin böyük siyasi uğuru kimi dəyərləndirilən Avronest PA-nın sessiyasında 17 ölkədən 160-dan çox qonaq iştirak edib. Mühüm qərarların qəbul edildiyi sessiyanın yüksək səviyyədə təşkil olunması iştirakçılar, xüsusilə də Avronest PA-nın həmprezidentləri Kristian Vigenin və Boris Tarasyuk tərəfindən vurğulanıb.

Şamaxının millət vəkili Elxan Süleymanovun rəhbərliyi ilə hazırlanmış kitabın buraxılışına məsul siyasi elmlər üzrə fəlsəfə doktoru Fuad Babayevdir. SSRİ Dövlət mükafatı laureatı, əməkdar incəsənət xadimi, Milli Məclisin Mətbuat xidmətinin baş məsləhətçisi Rafiq Qəmbərovun fotolarının yer aldığı nəfis tərtibatlı foto-albom “Şərq-Qərb” nəşriyyatında çap edilib.