Deputat yüksək balla ali məktəblərə daxil olmuş məzunlara təqaüd ayırdı
Modern.az xəbər verir ki, 85 saylı Şamaxı seçki dairəsinin deputatı Elxan Süleymanov sentyabrın 14-də Şamaxı şəhərindəki qərargahında M.Ə.Sabirin yaradıcılığına həsr olunmuş birinci və ikinci qiraət müsabiqələrinin qalibləri, eləcə də rayonun orta məktəblərinin 2011-ci və 2012-ci illərdə yüksək balla respublikanın ali məktəblərinə daxil olmuş məzunları ilə görüşüb. Gəncləri salamlayan deputat yeni dərs ilində şagird və tələbələrə uğurlar arzulayıb və növbəti təqaüdləri təqdim edib. Sərbəst güləş üzrə yeniyetmələr arasında Avropa çempionu (2012), sərbəst güləş üzrə yeniyetmələr arasında dünya birinciliyinin gümüş medalçısı, gənclər arasında dünya birinciliyinin gümüş mükafatçısı Ruslan Surxayev də tədbirdə iştirak edib.
Böyük satirikin yaradıcılığına həsr olunmuş qiraət müsabiqəsi deputat E.Süleymanovun təşəbbüsü və Söz Azadlığını Müdafiə Fondunun təşkilatçılığı ilə ikinci ildir ki, Şamaxı məktəblərində təhsil alan şagirdlər arasında keçirilir. Müsabiqə qalibləri deputatın təyin etdiyi təqaüdü alırlar. Bundan başqa deputat ötən ildən etibarən 600-dən çox bal toplayaraq ali məktəblərə daxil olmuş Şamaxı orta məktəblərinin məzunlarına da hər ay təqaüd verir. Qeyd edək ki, sabah yeni dərs ilinin başlaması münasibətilə, deputat Elxan Süleymanov Şamaxının mərkəzində 2 saylı orta məktəbin, eləcə də Dəmirçi və Ərçiman kənd məktəblərinin müəllim və şagirdləri ilə görüşəcək.
