Azərbaycan nümayəndə heyəti Polşaya gedəcək
Yanvarın 30-dan fevralın 3-dək geniştərkibli Azərbaycan nümayəndə heyəti Polşaya səfər edəcək.
«Vətəninfo.az»ın məlumatına görə, səfər Polşa tərəfdən AvroNest PA-nın vitse-prezidenti, Avropa Parlamentinin deputatı Jaçek Sayruş-Volski və Azərbaycan tərəfdən AvroNest PA-da Azərbaycan nümayəndə heyətinin rəhbəri, Şamaxının millət vəkili Elxan Süleymanov arasında əldə edilmiş razılıq əsasında baş tutacaq. Elxan Süleymanov suallarımızı cavablandıraraq bildirdi ki, səfərdə əsas məqsəd Polşa və Azərbaycan arasında təhsil sahəsində əməkdaşlıq, müəllim və tələbə mübadiləsinin həyata keçirilməsi üçün həlli vacib məsələləri müzakirə etməkdir.
Millət vəkili Azərbaycan və Polşa münasibətlərinin həm ikitərəfli, həm də çoxtərəfli əsaslarla inkişaf edərək müxtəlif sferaları əhatə etdiyini qeyd etməklə yanaşı bu münasibətlərin xüsusilə siyasi, humanitar, iqtisadi, o cümlədən enerji təhlükəsizliyi sahələrində daha əhatəli olduğunu vurğuladı. O, qeyd etdi ki, deyilənlərlə yanaşı, Polşa Avropa İttifaqının Şərq Tərəfdaşlığı proqramının təşəbbüskarıdır və bu proqram çərçivəsində Azərbaycanla digər Şərq Tərəfdaşı ölkələri arasında sıx əməkdaşlıq münasibətlərinin təmin edilməsində əhəmiyyətli rol oynayır.
Səfərin məqsədinin həm də qeyd edilən amillərlə bağlı olduğunu diqqətə çatdıran millət vəkili səfər çərçivəsində Azərbaycan nümayəndə heyətinin Varşava ilə yanaşı həm də Lodz, Zgerj və Unievoy şəhərlərində görüşlər keçirəcəyini qeyd etdi.
Səfərə xüsusi önəm verdiyini qeyd edən Elxan Süleymanov vurğuladı ki, Polşaya səfər edəcək nümayəndə heyətinə Təhsil Naziri Misir Mərdanov, Sənaye və Energetika Naziri Natiq Əliyev, Millət vəkilləri Abel Məhərrəmov, Səməd Seyidov, Gülçöhrə Məmmədova, Şamaxı rayonunun icra başçısı Asif Məmmədov, o cümlədən ölkəmizin AvroNest PA-da nümayəndə heyətinin üzvləri olan millət vəkilləri Qüdrət Həsənquliyev, Fazil Mustafa, Fərəc Quliyev və Ceyhun Osmanlı daxildir.
