Şamaxının millət vəkili, Avronest PA-da Azərbaycan nümayəndə heyətinin rəhbəri və AŞPA-da Azərbaycan nümayəndə heyətinin üzvü Elxan Süleymanovun dəvəti ilə Avropa Parlamenti üzvlərindən ibarət nümayəndə heyəti 8-11 mart tarixlərində Bakıda səfərdə olacaq. Alen Desteks, Dan Yorqensen, Norbert Noyzer və digərlərinin daxil olduğu nümayəndə heyəti dövlət rəsmiləri ilə bir neşə görüş keçirəcək və Ağdama gedərək məcburi köçkün qəsəbəsi ilə tanış olacaq. Martın 8-i axşam saatlarında Bakıda olacaq parlamentarilərin Azərbaycan rəsmiləri ilə görüşləri martın 9-da başlayacaq

. Qonaqlar ilk olaraq Baş Nazirin müavini və Azərbaycan Respublikasının Qaçqın və Məcburi Köçkünlərlə İş üzrə Dövlət Komitəsinin sədri cənab Əli Həsənovla görüşəcək. Daha sonra Azərbaycan Respublikasının Sənaye və Energetika naziri cənab Natiq Əliyev nümayəndə heyətini qəbul edəcək.Günün ikinci yarısında Avropalı deputatlar Milli Məclisin sədri cənab Oqtay Əsədov, Azərbaycan Respublikasının Kənd Təsərrüfatı naziri cənab İsmət Abbasov və ARDNŞ-in vitse-prezidenti cənab Elşad Nəsirovla görüşlər keçirəcək. Günün sonunda qonaqları Azərbaycan Respublikasının Xarici İşlər naziri cənab Elmar Məmmədyarov qəbul edəcək.

Martın 10-da Avropalı parlamentarilər Helikopterlə Ağdamda yerləşən məcburi köçkün qəsəbəsinə səfər edəcək. Səfər zamanı qonaqlar məcburi köçkünlərin həyat şəraiti ilə yerində tanış olacaq. Paytaxta qayıtdıqdan sonra nümayəndə heyətinin Köhnə Bakıya səyahəti nəzərdə tutulur. Qonaqlar martın 11-i səhər ölkəmizdən ayrılacaq. /diyarshunasliq.az/