AVCİYA-nın “Sərsəng Harayı” layihəsi çərçivəsində Yevlaxda toplantı keçirildi
Azərbaycanda Vətəndaş Cəmiyyətinin Inkişafına Yardım Assosiasiyası “Sərsəng Harayı” layihəsi çərçivəsində Yevlax rayonunda regional toplantı keçirilib
Toplantıda Yevlax rayonu icra hakimiyyətinin nümayəndələri, AVCİYA rəhbəri Elxan Süleymanov və təşkilatın üzvləri, həmçinin Sərsəng su anbarının təhlükə yaratdığı rayonlardan nümayəndələr qatılıb. Tədbiri giriş sözü ilə açan AVCİYA-nın vitse-prezidenti Vəli Əlibəyov toplantının əhəmiyyətindən danışıb. Daha sonra Yevlax rayon icra hakimiyyətinin birinci müavini Namiq Süleymanov çıxış edərək Sərsəng su anbarının yarada biləcəyi təhlükə haqda məlumat verib.
AVCİYA prezidenti Elxan Süleymanov Sərsəng su anbarının mövcud təhlükəsi haqda danışıb. O, ermənilər tərəfindən azərbaycanlılara qarşı törədilən vəhşiliklərdən söz açıb: “1905-ci ildən ermənilərin azərbaycanlılara qarşı başlayan soyqırım siyasəti bu günədək davam edir. Sərsəng ətrafı altı rayonu da böyük təhlükə gözləyir”.
AVCİYA-nın təşkilatçılığı ilə baş tutan layihə çərçivəsində “Sərsəng Harayı” rəsm və jurnalistlər arasında yazı müsabiqəsinin qalibləri diplom və sertifikatlarla təltif edilib.
