Şamaxıda bədii qiraət müsabiqəsinə yekun vuruldu
Elxan Süleymanov: “Yeniyetmə və gənclərimizdə ədəbiyyata olan marağın artmasında bu cür müsabiqələrin təşkili xüsusi önəm kəsb edir”
Şamaxıdan millət vəkili, AVCİYA-nın prezidenti Elxan Süleymanovun təşəbbüsü, Söz Azadlığını Müdafiə Fondu (SAMF) ilə Azərbaycanda Vətəndaş Cəmiyyətinin İnkişafına Yardım Assosiasiyasının birgə təşkilatçılığı ilə həyata keçirilən Mirzə Ələkbər Sabirin yaradıcılığına həsr olunmuş III bədii qiraət müsabiqəsinə yekun vurulub.
Şamaxı Mədəniyyət Sarayında baş tutan təqdimat mərasimində musabiqənin gedişinə həsr olunmuş sərgiyə də baxış keçirilib.
Tədbiri giriş sözü açan Söz Azadlığını Müdafiə Fondunun sədri Musa Yaqub layihə çərçivəsində təşkilat komitəsinin üzvlərinin rayon təhsil müəssisələrində keçirdiyi görüşlərdən danışaraq, müsabiqəyə böyük maraq olduğuu və III dəfə keçirilən müsabiqənin final turunda 193 nəfərin iştirak etdiyini dilə gətirmişdir. Onun sözlərinə görə, AVCİYA-nın prezidentinin təşəbbüsü ilə hər ay 29 nəfərə Mirzə Ələkbər Sabir adına, iki nəfərə isə Seyyid Əzim Şirvani adina təqaüd verilir.
SAMF-ın sədri ədəbiyyat müəllimlərinin iştirakı ilə keçirilən görüşlərin əhəmiyyətindən danışaraq üçüncü dəfə keçirilən müsabiqəyə edilən bəzi əlavələr haqqında tədbir iştirakçılarını məlumatlandırmışdır.
Qeyd edək ki, müsabiqənin təşkilində əsas məqsəd yeniyetmə və gənclər arasında Sabir yaradıcılığının təbliği, görkəmli şairin yaradıcılığının tədris prosessində təbliginə metodiki dəstək vermək, tədris prosessində fəal şagird və tələbələri üzə çıxarmaqla onları həvəsləndirməkdir.
Tədbirdə Şamaxı RİH başçısının birinci müavini Qasım Qasımov, filologiya üzrə fəlsəfə doktoru Eyvaz Eminalıyev, Məlhəm kənd tam orta məktəbinin ədəbiyyat müəllimi Rəfiqə Ağayeva, o cümlədən münsiflər heyətinin üzvləri – M.Ə.Sabirin ev muzeyinin direktoru Rəqsanə Xəlilzadə, əməkdar artistlər Azad Şükürov və Ağalar Bayramov çıxış edərək belə müsabiqənin keçirilməsinin əhəmiyyətindən danışaraq müsabiqənin təşilatçılarına minnətdarlıqlarını bidiriblər.
Sonda AVCİYA-nın prezidenti Elxan Süleymanov çıxış edərək Şamaxının Azərbaycan mədəniyyətinə çoxsaylı şəxsiyyət bəxş etdiyini və bunların arasında Sabirin xüsusi rolu olduğunu vurğulayıb. Millət vəkilinin sözlərinə görə, bu gün yeniyetmə və gənclərimizdə ədəbiyyata olan marağın artmasında bu cür müsabiqələrin təşkili xüsusi önəm kəsb edir. Qaliblərin yetişməsində ədəbiyyat müəllimlərinin müstəsna xidmətləri olduğunu bildirən müsabiqənin ideya müəllifi bu dəfəki müsabiqədə çoxsaylı qalibləri olan müəllimlərin də xüsusi diplomlarla təltif edildiyi bildirib.
Çıxışının sonunda Elxan Süleymanov bu günədək keçirilən müsabiqə qaliblərinin iştirakı ilə Bakıda geniş teatrlaşdırlımış təqdimatın keçiriləcəyini birdirmiş, on iki nəfər qalibə diplom və pul mükafatları təqdim edib.
