Şamaxıda altıncı Sabir bədii qiraət müsabiqəsinə yekun vuruldu

• 20.05.2016 11:31

 Azərbaycanda Vətəndaş Cəmiyyətinin İnkişafına Yardım Assosiasiyasının və Söz
Azadlığını Müdafiə Fondunun birgə təşkil etdiyi müsabiqə ənənəyə uyğun olaraq
iki mərhələdə keçirilir. Əvvəlcə təhsil müəssislərində keçirilən müsabiqənin
qalibləri rayon səviyyəsindəki tədbirə qatılırlar. Yüzdən artıq iştirakçının
qatıldığı müsabiqənin yekun turu şair Musa Yaqubun rəhbərlik etdiyi münsiflər
heyəti tərəfindən qiymətləndirildi.

May ayının
19-da isə Şamaxı şəhər Mədəniyyət Sarayında müsabiqə qaliblərinin  mükafatlandırılma mərasimi keçirildi. Mərasimi
giriş sözü ilə şair Musa Yaqub açaraq, altıncı ildir keçirilən Sabir bədii qiraət
müsabiqəsinin artıq Şamaxının mədəni həyatında mühüm hadisəyə çevrildiyini
vurğuladı. Filologiya üzrə fəlsəfə doktoru, Sabir tədqiqatşısı Eyvaz Eminalıyev
böyük şairin yaradıcılığının həmişə insanları cəlb etdiyini bildirdi və qeyd
etdi ki, buna görə də məktəblilərdə bu müsabiqəyə diqqət səngimir. Şamaxı rayon
İcra Hakimiyyətinin başçısı Asif Ağayev millət vəkili Elxan Süleymanovun rayon ərazisində
həyata keçirdiyi müxtəlif xeyriyyə tədbirlərindən bəhs etdi və bildirdi ki,
Sabir bədii qiraət müsabiqəsi bu tədbirlər içərisində xüsusilə seçilir. Müsabiqənin
münasiflər heyətinin üzvləri – filologiya elmləri doktoru, professor Nadir
Abdullayev, Sabir ev-muzeyinin direktoru, əməkdar mədəniyyət işçisi Rəqsanə Xəlilova,
filologiya üzrə fəlsəfə doktoru Vəfa Yunusova, eləcə də jurnalist Elşad Məmmədli
çıxış edərək müsabiqə ilə bağlı təəssüratlarını bölüşdülər. Şamaxının millət vəkili
Elxan Süleymanov seçicilərlə növbəti görüşdən məmnunluğunu ifadə etdi və son
dövrdə gördüyü işlərlə bağlı hesabat verdi. Millət vəkili qiraət müsabiqəsinin
hər il yeni-yeni istedadlı uşaq və gənclərin aşkar edilməsindəki rolunu
vurğuladı.