Şamaxının millət vəkili Elxan Süleymanov yüksək balla ali məktəblərə qəbul olunmuş şamaxılı gənclərlə görüşüb
Şamaxının millət vəkili Elxan Süleymanov sentyabrın 12-də Şamaxı şəhərində bu il yüksək balla ali məktəbə daxil olmuş Şamaxı məktəblərinin məzunları ilə görüşüb.
Görüş zamanı millət vəkili tələbə adı qazanmış gəncləri təbrik edib, onlara öz tövsiyələrini çatdırıb. Qeyd edək ki, bu il Şamaxı tam orta məktəblərinin 18 məzunu 600-dən çox bal toplayaraq ölkənin nüfuzlu ali məktəblərinə daxil olub. Bu məzunların üçü TNTTF liseyinin, ikisi Avropa liseyinin, ikisi şəhər 3 saylı, ikisi Göylər kənd 1 saylı, qalanları isə şəhər 2, 6 və 9 saylı, Şəhriyar qəsəbə, Çaylı, Nağaraxana, Muğanlı, Məlhəm və Göylər kənd 2 saylı tam orta məktəblərinin məzunlarıdır.
600-dən çox bal toplayan məzunlar Azərbaycan Dövlət Tibb Universitetinə (Elnur Qasımov, Sitarə Məmmədova, Anar Dünyamalıyev, Brilyant Hacıyeva, Ayşən Mahmudova, Cavanşir Eminli), Bakı Dövlət Universitetinə (Əziz Cəbiyev, Aişə Manafova, Narıngül Məlikova, Günel Həsənova), Azərbaycan Dövlət Dillər Universitetinə (Vaqif Fətullayev, Şəfəq Rəhimova, Süleyman Abdurahmanov), Azərbaycan Respublikası Prezidenti yanında Dövlət İdarəçilik Akademiyasına (Elvira Abdullayeva), Bakı Ali Neft Məktəbinə (Natiq Babayev), Azərbaycan Dövlət İqtisad Universitetinə (Zərifə Babayeva), Bakı Mühəndislik Universitetinə (Sevinc Bağırova), Xəzər Universitetinə (Əli Abdurahmanov) qəbul olunublar.
Görüşün sonunda yeni tələbə adı qazananlara hədiyyələr təqdim olunub və xatirə foto-şəkli çəkdirilib.
