AŞPA məruzəçisi AVCİYA üzvləri ilə görüşüb

Bakı-APA. “Azərbaycanın sərhədyanı bölgələrinin sakinlərinin qəsdən sudan məhrum edilməsi” üzrə AŞPA məruzəçisi xanım Meliça Markoviçin Azərbaycana növbəti səfəri başlayıb.

Bakı-APA. “Azərbaycanın sərhədyanı bölgələrinin sakinlərinin qəsdən sudan məhrum edilməsi” üzrə AŞPA məruzəçisi xanım Meliça Markoviçin Azərbaycana növbəti səfəri başlayıb.


Səfərin ilk günü məruzəçi və onu müşayiət edən müstəqil ekspert Styliani Lydia Vamvakeriounun də daxil olduğu 5 nəfərlik nümayəndə heyəti ilə Azərbaycanda Vətəndaş Cəmiyyətinin İnkişafına Yardım Assosiasiyasının (AVCİYA) üzvləri ilə görüşüb. AVCİYA-dan APA-ya verilən məlumata görə, görüşdə Sərsəng su anbarının Ermənistanın işğalı altında olması səbəbindən su anbarının təsiri altında olan 6 rayonun – Ağcabədi, Ağdam, Bərdə, Goranboy, Tərtər və Yevlax rayonlarının sosial-iqtisadi vəziyyətində baş vermiş dəyişikliklər, bu regionda yaşayan əhalinin içməli su çatışmazlığından əziyyət çəkməsi, habelə regionda kənd təsərrüfatının su qıtlığı səbəbindən böhran içərisində olması, ərazidə biomüxtəlifliyin pozulması, Su anbarına və onun qurğularına 20 ildən artıq müddətdir ki, texniki xidmət göstərilmədiyi üçün qəza vəziyyətində olması  səbəbindən onun aşağı axımında yerləşən ərazilərin 400 min nəfər əhalisi üçün ciddi təhlükə yaratması və sair bu kimi mühüm məsələlər müzakirə edilib, bu məsələlərlə bağlı vətəndaş cəmiyyətinin ciddi narahatlığı ifadə olunub.

 

Xatırladaq ki, Sərsəng su anbarı ilə bağlı məsələ ilk dəfə 2013-cü ilin may ayında AVCİYA-nın “Sərsəng – humanitar faciənin qarşısının alınması” layihəsinin icrasına başlaması ilə gündəmə gətirilib. Millət vəkili, Azərbaycanın AŞPA-da nümayəndə heyətinin üzvü Elxan Süleymanovun gərgin mübarizəsi nəticəsində və AŞPA-ya təqdim etdiyi “Azərbaycanın cəbhəyanı rayonlarında mülki əhalinin qəsdən sudan məhrum edilməsinə dair” qətnamə layihəsi əsasında 12 may 2014-cü  ildə AŞPA-nın Sosial Məsələlər, Səhiyyə və davamlı inkişaf Komitəsində Bosniya və Herseqovinalı deputat, xanım Meliça Markoviç məsələ ilə bağlı məruzəçi təyin edilib.

 

Hazırkı  səfər məruzəçi Meliça Markoviçin Azərbaycana ikinci rəsmi səfəridir. Avqustun 24-dən başlayan səfər 27 avqustədək davam edəcək. Səfər çərçivəsində Bakıda bir sıra nazirlik rəsmiləri ilə görüşlər keçiriləcək, regiona səfər ediləcək və su anbarının təsiri altında olan rayonların bir sıra qurumları, eləcə də yerli icmaları ilə görüşlər baş tutacaq.

Bənzər mövzular

“Qarabağ” futbol klubu Azərbaycanın informasiya raketinin daşıyıcısıdır
Şamaxının millət vəkili daha bir məktəbi şagirdlərə hədiyyə etdi
Millət vəkili Elxan Süleymanovun təşəbbüsü və dəstəyi ilə inşa olunan Qaraman kənd məktəbinin açılışı oldu
Millət vəkili Elxan Süleymanov yüksək balla ali məktəbə qəbul olunan məzunları təbrik edib